Prej dhjetë ditësh, naftëtarët e Marinzës vazhdojnë grevën e urisë pa afat, duke kërkuar plotësimin e kërkesave të tyre për paga dhe kushte më të mira pune. Sot, ata u mblodhën sërish në një tubim para zyrave të “Bankers Petroleum”, me pankarta në duar dhe vendosmërinë për t’i shkuar kauzës së tyre deri në fund.

Sipas Dritan Shahut, kreut të Sindikatës së Sektorit Hidrokarbur, përfaqësues të kompanisë kanë fotografuar dhe filmuar punonjësit, si një formë presioni që — sipas tij — është përdorur edhe në protestat e mëparshme.

Ndërkohë, gjendja shëndetësore e 10 anëtarëve të këshillit sindikal që ndodhen në grevë urie po përkeqësohet çdo ditë.
Naftëtarët Sotiraq Dano dhe Dorjan Dylmishi shprehen se janë të gatshëm të rrezikojnë jetën, por nuk do të tërhiqen pa marrë përgjigje:

“Jemi inxhinierë, por të mjerë. Kryeministri thotë që profesionistë s’ka — ja ku jemi, le të na dëgjojë.”

Pavarësisht situatës kritike, kompania ende nuk ka dhënë një zgjidhje konkrete, ndërsa as Kryeministri Rama dhe as Ministria përkatëse nuk kanë reaguar publikisht.

Thirrje për ndërhyrje qeveritare

Naftëtarët i kanë bërë thirrje institucioneve shtetërore që të ndërhyjnë për të gjetur një zgjidhje të drejtë dhe të qëndrueshme, para se gjendja shëndetësore e grevistëve të bëhet e pakthyeshme.

“Shëndeti ynë po rrezikohet seriozisht. Shpresojmë që institucionet të reagojnë para se të jetë vonë,” – u shpreh një nga përfaqësuesit e grevistëve.

Kërkesat kryesore të naftëtarëve të Marinzës:

1. Rritje e fondit të pagave me 18%, duke u shpërndarë për punonjësit e fushës.
2. Rritje e trajtimit ushqimor nga 9 000 lekë në 13 200 lekë.
3. Zbatimi i ligjit të statusit të naftëtarit.
4. Drejtësi dhe barazi në shpërblime.
5. Meritokraci në promovime dhe ngritje në detyrë.