Gjykata e Kurorës në Oksford ka dënuar me dy vite burg 20-vjeçarin shqiptar Martin Makarjadhi, banues në Broadlands, Netherfield, Milton Keynes, pas shpalljes fajtor për posedim dhe shpërndarje të lëndëve narkotike të klasit A dhe B, si dhe për drejtim automjeti pa sigurim të detyrueshëm.

Sipas mediave britanike, Makarjadhi ishte kapur duke shitur kokainë dhe kanabis në rrugët e Anglisë. 20-vjeçari kishte hyrë ilegalisht në Britani për të shlyer një borxh prej 15 mijë paundësh dhe gjatë kontrollit, në rrobat e tij të brendshme u gjetën 13 qese me kokainë. Në banesën e tij u sekuestruan edhe 1,000 paund, kanabis dhe pajisje për përgatitjen e drogës. Ai u kap gjithashtu me 6.3 gramë kokainë, me vlerë rreth 640 paund në treg.

Gjyqtari Hassan Khan theksoi:

“Mosha nuk e shpëton nga burgu. Ai është djali i një oficeri policie në Shqipëri.”

Avokati mbrojtës Nick Cotter deklaroi se Makarjadhi vjen nga një familje e mirë, ku i ati është oficer policie dhe e ëma mjeke, dhe se është detyruar nga të tjerët të përfshihej në këtë veprimtari kriminale.

Gjyqtari gjithashtu shtoi:

“E dije shumë mirë që ajo që po bëje ishte e gabuar.”

Gjykata urdhëroi gjithashtu konfiskimin e drogës, telefonit, pajisjeve dhe shumave të parave të sekuestruara, duke bërë të qartë se mosha dhe origjina familjare nuk e shpëtojnë nga ligji.