Detaje të reja kanë dalë nga hetimet për vrasjen e picierit Indrit Islamllari, i cili u godit me thikë në gjoks, bark dhe krahë nga Filip Shehu, duke i shkaktuar vdekjen e menjëhershme. Ngjarja ndodhi në ambientet e brendshme të lokalit “City Lounge” pranë kompleksit “Kika 2” në Tiranë, ku si mjet prerës u përdor një thikë guzhine me mbishkrimin “Tramontina, Made in Brazil”.
Autori i krimit, Filip Shehu, është arrestuar dhe ndodhet nën masën e “arrestit në burg”, duke pranuar përgjegjësinë penale dhe shfaqur pendesë gjatë marrjes në pyetje në policinë e Tiranës.
Sipas dëshmitarit kryesor, Artur Fejzulla, koleg dhe picier në restorant, ngjarja zhvilloi një mënyrë dramatike. Ai ka treguar se ka tentuar të ndalojë Shehun, i cili i ka thënë:
“…do ta vras, se na ka çarë by**ën…”
Fejzulla ka deklaruar se në momentin e sulmit ishte duke pirë cigare, kur u kthye nga kuzhina dhe pa Shehun duke goditur Indritin. Ai menjëherë u përpoq ta ndante autorin dhe të shmangte sulme të tjera, por pa mundur të parandalonte tragjedinë.
“…unë kur jam kthyer për një moment, kam parë Filipin që po e qëllonte me thikë Indritin…”, ka raportuar dëshmitari.
Pas sulmit, Fejzulla ka tentuar të ndihmojë të plagosurin, duke mbajtur plagët për të parandaluar gjakderdhjen deri në ardhjen e ambulancës dhe policisë.
