Kandidati republikan për president të SHBA-së, Donald Trump, u rikthye në aktivitetet e fushatës zgjedhore për herë të parë pas atentatit të dytë që u përpoq t’i merrte jetën. Gjatë një fjalimi në Flint, Michigan, Trump u shpreh me ironi duke theksuar se “vetëm presidentëve të rëndësishëm u bëhet atentat”. Ai vazhdoi duke komentuar se kandidimi për president është një biznes i rrezikshëm dhe se sulmet ndaj tij nuk duhet të jenë të papritura.

Në të njëjtën kohë, nënpresidentja aktuale e SHBA-së, Kamala Harris, e ka kontaktuar Trump pas incidentit, duke i shprehur keqardhjen dhe mbështetjen e saj. “Bisedova me të për të parë se si është. I thashë atë që kam thënë publikisht: nuk ka vend për dhunë politike në vendin tonë”, deklaroi Harris gjatë një interviste për Asociacionin Kombëtar të Gazetarëve me Ngjyrë.

Atentati i dytë ndaj Trump ndodhi më 15 shtator, pranë klubit ndërkombëtar të golfit në West Palm Beach, Florida, ndërsa ai po luante golf. Pas të shtënave me armë zjarri, Shërbimi Sekret njoftoi se Trump ishte mirë, ndërsa policia arrestoi një 58-vjeçar, Ryan Routh, i cili akuzohet për tentativë për të qëlluar ish-presidentin.