Një incident me dron rus ka shkaktuar alarm pranë kufirit të Ukrainës me Poloninë, pasi një tren pasagjerësh në linjën Kiev-Varshavë u godit në rajonin e Volynit.

Ngjarja ndodhi në orët e para të së dielës, rreth orës 05:00, ndërsa në të njëjtën zonë ndodhej edhe ish-kryeministri britanik Boris Johnson, i cili po udhëtonte me një tren tjetër pas pjesëmarrjes në një konferencë sigurie në Kiev.

Treni me të cilin udhëtonte Johnson mori një paralajmërim për evakuim pasi një tjetër tren pasagjerësh, që ndodhej vetëm pak minuta pas tij, u godit nga një dron rus pranë pikës kufitare me Poloninë.

Në trenin e goditur ndodheshin 206 persona. Pas alarmit, pasagjerët u evakuuan, ndërsa nuk raportohet për persona të plagosur. Sipas raportimeve, goditja preku lokomotivën e trenit.

Boris Johnson dhe personat që udhëtonin me të nuk u prekën nga sulmi.

Në të njëjtin tren me ish-kryeministrin britanik ndodhej edhe ish-kryeministri suedez Carl Bildt, së bashku me zyrtarë dhe diplomatë të tjerë europianë.

Bildt tha se treni i tyre nuk u godit dhe se pasagjerët morën vetëm një paralajmërim për evakuim.

Pas kontrollit të zonës dhe konstatimit se nuk kishte më dronë të tjerë në afërsi, treni me të cilin udhëtonin Johnson dhe zyrtarët europianë vijoi rrugën drejt Polonisë.

Incidenti ndodhi rreth 2 kilometra nga kufiri polak, duke e bërë ngjarjen veçanërisht të ndjeshme për sigurinë e vendeve të NATO-s.

Sulmet ruse pranë kufirit me Poloninë

Goditja ishte pjesë e një vale të gjerë sulmesh ajrore ruse ndaj Ukrainës.

Sipas raportimeve të fundit, sulmet kanë prekur edhe pika të tjera të infrastrukturës hekurudhore dhe zona pranë kufirit me Poloninë.

Rusia pretendon se goditjet synojnë infrastrukturën që përdoret për transportin e pajisjeve ushtarake nga Europa drejt Ukrainës.

Incidenti pranë kufirit polak rikthen shqetësimet për rrezikun që sulmet ajrore të luftës në Ukrainë të afrohen gjithnjë e më shumë me territorin e vendeve anëtare të NATO-s.