Tiranë – Gazetarja investigative Klodiana Lala ka ngritur shqetësime të forta mbi ndikimin e krimit të organizuar në zgjedhjet e fundit në qarkun e Elbasanit, duke përmendur rastin e deputetes socialiste Sara Mila, e cila rezultoi si më e votuara në këtë zonë, ndonëse – sipas Lalës – ishte thuajse e panjohur për publikun.

E ftuar në emisionin “Të Paekspozuarit”, Lala deklaroi se suksesi elektoral i Milës ngre dyshime serioze, duke shtuar se qytetarët në Elbasan dhe Librazhd janë shprehur privatisht se u orientuan të votonin për të, ndonëse nuk njihnin kontribut publik të saj.

“Është e çuditshme që një zonjë pa asnjë prani publike rezulton gruaja më e votuar në qarkun e Elbasanit. 90% e qytetarëve nuk e njihnin fare,” – u shpreh Lala, duke shtuar se “ka indicie se pas këtij rezultati mund të fshihet ndikimi i grupit të Suel Çelës.”

Sipas gazetares, skema e patronazhimit ka funksionuar si një mjet presioni dhe intimidimi, duke ndikuar drejtpërdrejt në orientimin e votës. Ajo theksoi se administrata është angazhuar në mbledhjen e votave të fotografuara, madje edhe nga diaspora, ndërsa qytetarët janë shprehur se kishin frikë të tregonin votën e tyre të vërtetë.

“Shqipëria është zbrazur. Pjesa dërrmuese janë punonjës të administratës, të cilëve u është kërkuar të sjellin vota të dokumentuara,” – theksoi Lala, duke e cilësuar këtë si një deformim të rëndë të procesit zgjedhor.

Në fund, gazetarja i bëri thirrje SPAK-ut që të hetojë me seriozitet rreth burimeve të financimit dhe mbështetjes së mundshme kriminale për kandidate të caktuara, siç është rasti i Sara Milës.

“Ka figura me kontribut të çmuar brenda PS që nuk morën asnjë votë. Ndërsa në Elbasan, një person i panjohur del e para. Kjo ngre shumë pikëpyetje,” përfundoi Lala.

Ndërkohë, vetë deputetja Sara Mila nuk ka reaguar ende për këto akuza.