Një punonjës policie dhe dy persona të tjerë janë arrestuar në flagrancë në kuadër të operacionit të koduar “Basti i Fundit”, pas një hetimi për organizimin e lojërave të fatit në kundërshtim me ligjin dhe veprimtari të tjera të paligjshme në zonën e Fushë-Krujës.

Sipas Agjencisë së Mbikëqyrjes Policore (AMP), në pranga ka rënë Lutfi Dervishi, me detyrë Ndihmës Specialist i Policimit në Komunitet në Fushë-Krujë, i dyshuar për veprat penale “Shpërdorim detyre” dhe “Organizimi ose ushtrimi i veprimtarive të lojërave të fatit në kundërshtim me ligjin”.

Gjithashtu janë arrestuar edhe Sabah Stafuka dhe Fatmir Stafuga, banorë të zonës së Arrameras në Fushë-Krujë, të dyshuar për organizim të lojërave të fatit të paligjshme dhe prodhim e shitje të narkotikëve.

Gjatë kontrolleve të kryera në ambientet nën hetim, autoritetet sekuestruan pajisje elektronike të dyshuara se përdoreshin për baste, serverë kompjuterikë, pajisje regjistrimi, telefona celularë dhe lëndë të dyshuar narkotike.

Në banesën e punonjësit të policisë Lutfi Dervishi u gjetën gjithashtu 119 fishekë të kalibrit 9 mm.

Sipas AMP-së, në cilësinë e provës materiale u sekuestruan:

* 4 pajisje elektronike të dyshuara për ushtrimin e lojërave të fatit;
* 2 serverë ose njësi kompjuterike që dyshohet se përdoreshin për aktivitetin e paligjshëm;
* 1 pajisje DVR;
* disa qese me lëndë të dyshuar narkotike me peshë totale rreth 6.63 gramë;
* 3 aparate telefonike celulare.

Hetimet vijojnë për dokumentimin e plotë të veprimtarisë së kundërligjshme, identifikimin e personave të tjerë të mundshëm të përfshirë, si dhe verifikimin nëse ka pasur raste favorizimi, mbështetjeje apo mosveprimi nga punonjës të strukturave ligjzbatuese.

Agjencia e Mbikëqyrjes Policore deklaron se do të vijojë kontrollet dhe hetimet ndaj çdo punonjësi që dyshohet se abuzon me detyrën ose përfshihet në veprimtari të paligjshme.