Deputeti demokrat Edmond Spaho ka reaguar ashpër pas vendimit të Sali Berishës për ta larguar nga drejtimi i Qarkut të Korçës, duke mbrojtur rezultatet e arritura në zgjedhje dhe duke kundërshtuar analizat e bëra nga gazetarët mbi performancën e tij. Spaho shprehet se ka fituar çdo palë zgjedhje në Korçë, duke përmbushur çdo direktivë të qendrës, dhe thekson se faktet dhe shifrat e rezultateve të tij elektorale janë të vërtetueshme në faqen e Komisionit Qendror të Zgjedhjeve (KQZ).

Spaho u hoq nga drejtimi i qarkut për shkak të mungesës së rezultateve. Në përgjigjen e tij publike, Spaho ka dhënë një përmbledhje të rezultateve të tij në zgjedhje që nga viti 2003, duke përmendur fitoret e tij në disa zgjedhje vendore dhe të përgjithshme.

Spaho përmend suksese si:

– 2003: Fitore në fushatën për Bashkinë e Korçës.
– 2005: Fitore si deputet në sistemin maxhoritar në zonën elektorale të caktuar.
– 2007: Fitore në 3 nga 4 komunat që mbulonte në zgjedhjet vendore.
– 2009: Fitore në 6 nga 6 komunat e mbuluara në zgjedhjet e përgjithshme.
– 2011: Fitore në 5 nga 6 komunat e mbuluara në zgjedhjet vendore.
– 2013: Pavarësisht humbjes së përgjithshme, zona e tij elektorale humbi vetëm 1800 vota, dhe ai arriti të fitojë në njësinë administrative të Pustecit.
– 2021: Arrihet objektivi i vendosur nga PD për 5 mandate në Korçë, duke marrë rreth 51,000 vota, një ndër tre qarqet që realizoi objektivat e partisë.

Sa i përket zgjedhjeve vendore të vitit 2023, Spaho shprehet se humbjet në Korçë, ashtu si në të gjithë Shqipërinë, ishin të lidhura me faktorë të njohur dhe jo për shkak të menaxhimit të tij.

Në përmbyllje, ai kritikon gazetaren Pasholli dhe gazetarin Maraku për komentet e tyre dhe u kërkon që të jenë më të kujdesshëm në të ardhmen, duke siguruar informacione të sakta para se të bëjnë deklarata publike. Sipas tij, “fjalët nuk janë si qentë që sa herë i therret kthehen prapa”, duke aluduar për nevojën e një debati të informuar dhe të saktë.