Prokuroria e Fierit ka dërguar për gjykim efektivin e forcave “Shqiponja”, Brian Dëma, i akuzuar për përfshirje në aktivitet kriminal, përfshirë trafik droge dhe shfrytëzim të një të mituri.

Sipas dosjes hetimore, 30-vjeçari, banues në lagjen “1 Maj”, u arrestua në vitin 2024, por është hetuar në gjendje të lirë dhe ka vijuar detyrën si punonjës policie gjatë kësaj kohe.

Prokuroria bën me dije se ndaj tij rëndojnë tre akuza: prodhim dhe shitje të lëndëve narkotike, shpërdorim detyre dhe shtytje e të miturit në krim.

Nga hetimet ka rezultuar se efektivi ka rekrutuar një 17-vjeçar, fillimisht për të marrë informacione në funksion të detyrës, por më pas e ka përfshirë në shpërndarjen e lëndëve narkotike. Sipas organit të akuzës, i mituri ishte përdorues droge dhe vinte nga një familje me vështirësi ekonomike, situatë që dyshohet se është shfrytëzuar nga i pandehuri.

Megjithëse gjatë kontrolleve në banesat e tij dhe të familjarëve nuk u gjetën lëndë narkotike, hetimi i mëtejshëm proaktiv ka arritur të sigurojë prova që, sipas prokurorisë, implikojnë drejtpërdrejt efektivin në aktivitetin e paligjshëm.

Autoritetet theksojnë se veprimet e tij kanë cenuar rëndë interesat e shtetit, rendin publik dhe sigurinë e të miturit, duke kërkuar mbajtjen e tij përgjegjës para drejtësisë.

Çështja tashmë i kalon gjykatës, e cila pritet të shqyrtojë provat dhe të japë vendimin përfundimtar mbi këtë rast.