Ish-prokurori i Tiranës, Elio Mazreku, është emëruar në detyrën e drejtorit të Hetimit Doganor, duke u rikthyer në një funksion publik pas largimit nga sistemi i drejtësisë.

Mazreku ishte shkarkuar më 23 nëntor 2023 nga Komisioni i Pavarur i Kualifikimit, pas procesit të vetingut, ku u ngritën dyshime lidhur me ligjshmërinë e burimeve financiare të familjes së tij.

Sipas vendimit të KPK-së, analiza financiare kishte evidentuar një mungesë justifikimi të të ardhurave në vlera të konsiderueshme, përfshirë një bilanc negativ prej rreth 22.8 milionë lekësh, si dhe paqartësi mbi burimet e përdorura për blerjen e një apartamenti në vitin 2010.

Po ashtu, trupi gjykues kishte konstatuar se nuk ishin provuar plotësisht disa deklarime për dhurata dhe ndihma familjare, ndërsa Mazreku i ka kundërshtuar gjetjet, duke këmbëngulur se të ardhurat kanë qenë të ligjshme dhe të justifikuara.

Ai ka nisur karrierën në sistemin e drejtësisë në vitin 2000 dhe për më shumë se dy dekada ka shërbyer si prokuror në Prokurorinë e Tiranës.