Menjëherë pas përfundimit të detyrës si Avokate e Popullit, Erinda Ballanca ka marrë një pozicion të ri me mandat afatgjatë në një strukturë të Bashkimit Europian.

Ministria e Drejtësisë ka caktuar Ballancën si anëtare vëzhguese në Bordin e Menaxhimit të Agjencisë së Bashkimit Europian për të Drejtat Themelore (FRA), ndërsa Gledis Gjipali është emëruar anëtar vëzhgues zëvendësues. Të dy do të ushtrojnë këtë funksion për një mandat pesëvjeçar, deri në vitin 2030.

Ky emërim pason përfundimin e mandatit të Ballancës si Avokate e Popullit, detyrë që ajo e mbajti për 5 vite të plota, me një shtesë prej 3 vitesh, duke tejkaluar afatin fillestar të parashikuar.

Agjencia e BE-së për të Drejtat Themelore (FRA) ka për mision mbledhjen e të dhënave, hartimin e raporteve dhe dhënien e rekomandimeve mbi respektimin e të drejtave të njeriut në vendet anëtare të Bashkimit Europian dhe në disa raste në vendet kandidate. Roli i anëtarëve vëzhgues nga vendet joanëtare, si Shqipëria, është kryesisht konsultativ dhe monitorues.