Deputeti i Partisë Socialiste, Erjon Braçe, ka reaguar ashpër ndaj vendimit të kompanisë Kurum për të mbyllur uzinën dhe për të shkarkuar rreth 500 punëtorë. Në një postim në Facebook, Braçe akuzon kompaninë për manipulim dhe kërkon që lodrat e saj me faliment ose vështirësi ekonomike të marrin fund.

Braçe thekson se Kurum nuk ka dalë asnjë vit me humbje dhe ngre pyetjen se ku kanë shkuar fitimet e kompanisë gjatë viteve të fundit. Sipas tij, pretendimet e Kurum për vështirësi ekonomike janë të pabaza dhe duhet të hetohen.

“Kurum nuk na bën dot për budallenj! Nuk e merr dot osh këtë vend! Lodra me faliment—këtë herë vështirësi ekonomike—duhet të marrë fund!” shkruan Braçe në postimin e tij. Ai vazhdon duke thënë se Kurum ka ndërprerë punën në dy prej segmenteve më fitimprurëse të prodhimit dhe ka lajmëruar punëtorët për ndërprerjen e kontratave të tyre, duke i paguar për vetëm tre muaj të tjerë. Braçe shpreh shqetësimin e tij për deklarimet e kompanisë mbi vështirësitë ekonomike, duke pyetur publikisht për rezultatet financiare të Kurum gjatë viteve 2018-2023, periudhë kur sektori i ndërtimit ishte në rritje dhe kompanitë e ndërtimit, përfshirë Kurum, nuk kanë raportuar humbje.

Ai ngre pikëpyetje për ligjshmërinë e mbylljes së aktivitetit të kompanisë në të kaluarën dhe bën thirrje që të mos lejohet të bëhet një tjetër manipulim i ngjashëm. Deputeti socialist përfundon postimin e tij duke theksuar se punëtorët nuk duhet të mbahen peng në këtë situatë dhe se është e domosdoshme që të hetohet nëse Kurum ka vepruar në përputhje me ligjin.

Përtej kësaj, Braçe i referohet edhe një zhvillimi të fundit, ku Prokuroria e Durrësit ka zbarkuar në zyrat e kompanisë Kurum në Elbasan dhe ka sekuestruar dokumentacion që dyshohet se lidhet me çështjen e qindra tonë mbetjeve të rrezikshme, të cilat janë eksportuar nga Shqipëria drejt Tajlandës. Ky eksport i dyshuar u denoncua më 5 gusht nga organizata mjedisore amerikane “Basel Action Network”, duke ngritur edhe më shumë dyshime rreth veprimtarive të kompanisë.