Trupi i Rayyan Alwan, 24-vjeçares palestineze të vrarë nga babai i saj në Tiranë, vijon të mbetet në morgun e kryeqytetit, pasi familjarët e saj nuk kanë shprehur asnjë interes për ta tërhequr.

Sipas burimeve pranë policisë, të afërmit e viktimës janë informuar për ngjarjen, por asnjë prej tyre nuk ka kërkuar të marrë trupin për ta përcjellë për në banesën e fundit.

Miqtë e Rayyan: “Duam ta varrosim në Berlin, por nuk dimë si të procedojmë”

Miqtë e 24-vjeçares, të cilët kanë kontaktuar me BalkanWeb, konfirmojnë se familja nuk dëshiron ta tërheqë trupin, pasi nëna dhe babai i saj kishin planifikuar vrasjen e saj.

Ata kanë kërkuar ndihmë nga autoritetet shqiptare për të bërë të mundur që trupi të transportohet dhe të varroset në Gjermani.

“Ne duam ta varrosim këtu në Berlin, por nuk dimë si të procedojmë. Nëna e saj është zhdukur dhe babai i saj ka ikur në Liban,” thanë ata.

Nëse brenda afateve ligjore askush nuk e tërheq trupin e Rayyan Alwan, ajo do të varroset në Shqipëri.

Si ndodhi vrasja e Rayyan Alwan?

Sipas hetimeve, Rayyan dhe babai i saj Fadi Alwan mbërritën në Shqipëri më 19 shkurt dhe u vendosën në një apartament me qira në rrugën Gjon Muzaka në Tiranë.

Më 22 shkurt, babai dyshohet se e vrau vajzën me goditje të shumta me thikë, e më pas u largua nga Shqipëria përmes Greqisë, duke kaluar në Amsterdam, dhe më pas në Liban, ku dyshohet se ndodhet aktualisht.

Trupi i pajetë i 24-vjeçares u gjet pesë ditë pas vrasjes nga pronarja e apartamentit, e cila kishte shkuar për të kontrolluar banesën.

Babai i saj, Fadi Alwan, ende nuk është arrestuar, ndërsa autoritetet shqiptare dhe ndërkombëtare janë vënë në ndjekje të tij.