Reperi i njohur Feronit Shabani, i njohur me emrin artistik Fero, është zyrtarisht i akuzuar nga Prokuroria Themelore në Gjilan për tri vepra penale: dhunë në familje, ngacmim seksual dhe kanosje serioze ndaj ish-bashkëshortes së tij, modeles Arbenita Ismajli.

Sipas aktakuzës së siguruar nga media, ngjarjet kanë ndodhur gjatë periudhës qershor–tetor 2024, kohë gjatë së cilës Fero dyshohet se ka ushtruar dhunë psikologjike sistematike ndaj Arbenitës, përmes fyerjeve të rënda, sjelljeve të padëshiruara verbale dhe fizike, si dhe kërcënimeve të rënda për jetën.

Çfarë përmban aktakuza?

Në aktakuzë thuhet se Fero i drejtohej Arbenitës me tone kontrolluese dhe denigruese, duke i thënë:

“Me kon je tu fol… për çka i ke ly buzt… qoma shpejt…”

Përveç thirrjeve telefonike shqetësuese, përplasjet mes çiftit ndodhnin edhe gjatë dorëzimit të fëmijës, ku, sipas Prokurorisë, Fero me veprimet e tij ka shkaktuar frikë, stres emocional dhe cenim të rëndë të dinjitetit së Arbenitës.

Ngacmim seksual i vazhdueshëm

Akuza e dytë lidhet me ngacmim seksual, ku Fero akuzohet se ka puthur ish-bashkëshorten kundër dëshirës së saj dhe i është drejtuar me fjalët:

“Ti je gruaja jem… unë kam të drejt me fjet me ty… nuk ki të drejt mem than jo.”

Pavarësisht refuzimeve të vazhdueshme, ai dyshohet se ka ushtruar presion psikologjik dhe veprime fizike, duke cenuar lirinë dhe integritetin personal të Arbenitës.

Kanosje me jetë

Ndër momentet më të errëta të kësaj marrëdhënieje është kërcënimi i drejtpërdrejtë me jetë. Në muajin shtator 2024, Fero thuhet se i ka dërguar ish-partneres kërcënime të tipit:

“Ke me ma ni krismën… të vraj… ta nxjerri shpirtin prej vendit… fëlqitë nga vendi t’i thej…”

Këto mesazhe janë bërë përmes aplikacionit WhatsApp dhe sipas aktakuzës, përbëjnë kërcënime serioze që kanë ndikuar në ndjenjën e sigurisë dhe qetësisë së viktimës.

⸻

Çfarë pritet tani?

Me ngritjen zyrtare të aktakuzës, çështja kalon në gjykatë, ku Fero do të përballet me rrezik të lartë ndëshkimi, nëse shpallet fajtor për të tria veprat penale. Çështja ka shkaktuar tronditje në publik, sidomos për shkak të profilit të lartë të të përfshirëve dhe mesazhit që dërgon për dhunën në marrëdhënie.

Rasti po monitorohet nga organizata për të drejtat e grave dhe pritet të shënojë një moment kyç në luftën kundër dhunës në familje dhe seksuale në Kosovë.

🛑 Asnjë formë dhune nuk duhet të normalizohet apo heshtet. Drejtësia duhet të thotë fjalën e saj.