Një aksident tragjik ndodhi mëngjesin e sotëm, më 15 Shkurt, në aksin Përrenjas-Librazhd, ku humbi jetën 20-vjeçarja Megi Xhetani. Ajo po udhëtonte bashkë me të fejuarin e saj, 33-vjeçarin Zef Sinani, pas një dreke për Shën Valentin në Pogradec. Aksidenti ndodhi pasi mjeti ku ata po udhëtonin përplasi një kamion me targa nga Shkupi, duke shkaktuar plagosjen e rëndë të Zef Sinanit dhe vdekjen e menjëhershme të Megi Xhetanit, e cila nuk arriti t’i mbijetonte plagëve të marra.

Çifti, të cilët kishin tre muaj që ishin fejuar, jetonin në Mamurras. Megi Xhetani ishte studente në Universitetin e Tiranës dhe vajza e vetme në familje. Ajo po kthehej me të fejuarin e saj për në shtëpi kur ndodhi aksidenti tragjik.

Zef Sinani u plagos rëndë dhe u transportua fillimisht në spitalin e Librazhdit, pastaj në Spitalin Rajonal të Elbasanit dhe për shkak të gjendjes së rënduar shëndetësore, ai u dërgua më pas në Spitalin e Traumës në Tiranë.

Policia ka njoftuar se, sipas hetimit paraprak, aksidenti ka ndodhur për shkak të humbjes së kontrollit mbi drejtimin e automjetit, ndërsa drejtuesi i mjetit, Zef Sinani, është arrestuar. Sipas autoriteteve, aksidenti ndodhi kur automjeti që ai drejtonte përplasi kamionin e drejtuar nga një shtetas nga Shkupi.

Ngushëllimet dhe reagimet për këtë tragjedi kanë qenë të shumta, ndërsa hetimet e policisë për shkakun e aksidentit vazhdojnë.