Policia e Tiranës ka finalizuar operacionin e koduar “Llamba”, duke goditur një rast të kultivimit të kanabisit në ambiente të mbyllura në fshatin Laknas.

Si rezultat i operacionit, u arrestuan dy vëllezër, të cilët kishin përshtatur banesën e tyre për kultivimin e bimëve narkotike, si dhe u procedua penalisht babai i tyre për moskallëzim krimi. Në pranga ka përfunduar edhe një punonjës i OSHEE-së, i dyshuar për shpërdorim detyre, pasi kishte lejuar lidhjen e paligjshme të energjisë elektrike.

Detajet e operacionit

Pas informacioneve të siguruara nga inteligjenca policore, shërbimet e Komisariatit Nr. 5 zbuluan një banesë të përshtatur për kultivimin e bimëve narkotike, ku ishin instaluar pajisje speciale ndriçimi dhe ventilimi. Energjia elektrike për këtë veprimtari kriminale merrej në mënyrë të paligjshme.

Gjatë operacionit u arrestuan shtetasit:
• Sh. M., 38 vjeç
• F. M., 28 vjeç

Ndërkohë, u procedua në gjendje të lirë babai i tyre, Z. M., 66 vjeç, pasi dyshohet se kishte dijeni për veprimtarinë e paligjshme dhe nuk e kishte kallëzuar.

Gjithashtu, u arrestua E. P., 29 vjeç, punonjës i OSHEE-së, i cili dyshohet se kishte favorizuar këtë veprimtari kriminale duke mos evidentuar lidhjen e paligjshme të energjisë elektrike.

Sekuestrimet

Gjatë kontrollit në banesë, policia sekuestroi si prova materiale:
• 20 bimë kanabis, rreth 60 cm të larta
• Një sasi lënde narkotike të përpunuar
• 5 llamba speciale për ndriçim dhe ngrohje
• 2 filtra për pastrimin e aromave
• 3 ventilatorë freskues
• 2 pajisje për matjen dhe rregullimin e temperaturës
• Pajisje të tjera elektrike të përdorura për kultivim

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.