Nënpresidentja Kamala Harris dhe ish-presidenti Donald Trump po përballen në një garë të ngushtë në shtatë shtetet e pavendosura, pak më shumë se dy javë para zgjedhjeve presidenciale të 5 nëntorit në Shtetet e Bashkuara, sipas një ankete të publikuar nga gazeta Washington Post dhe Fakulteti i Politikave dhe Qeverisë në Universitetin George Mason.

Harris, e cila u bë kandidate e partisë demokratike pas tërheqjes së Presidentit Joe Biden nga gara në korrik, kryeson me një rezultat 51% ndaj 47% në Xhorxhia. Nga ana tjetër, Trump ka një epërsi të vogël në Arizona me 49% përballë 46% të Harris. Rezultatet e anketës janë brenda kufirit të gabimit prej plus ose minus 4.5 pikë përqindje. Në këtë anketë morën pjesë 5,016 votues të regjistruar nga 30 shtatori deri më 15 tetor.

Zonja Harris ka gjithashtu një avantazh në shtetet si Pensilvani, Miçigan dhe Viskonsin, ku do të zhvillojë fushata të hënën së bashku me ish-ligjvënësen republikane Liz Cheney. Në Karolinën e Veriut, Trump kryeson, ndërsa në Nevada ata janë të barabartë, me 48% çdo kandidat. Trump planifikon të mbajë një tubim fushate në Karolinën e Veriut më vonë të hënën, pas inspektimit të dëmeve të shkaktuara nga uragani “Helene”.

Kjo është hera e tretë që 78-vjeçari Trump kandidon për postin e presidentit, pas humbjes në zgjedhjet e vitit 2020 ndaj demokratit Joe Biden. Ai vazhdon të akuzojë pa prova për manipulim të votave dhe përballet me akuza penale në nivel federal dhe shtetëror për përpjekjet për të përmbysur rezultatin e zgjedhjeve, si dhe me një numër çështjesh të tjera penale, të cilat i ka mohuar.

Nënpresidentja Harris, 60 vjeç, e cila ka qenë ish-prokurore e përgjithshme në Kaliforni dhe senatore amerikane, po përpiqet të rindërtojë një koalicion të gjerë me votues të rinj, gra dhe komunitete pakicë, si dhe të tërheqë mbështetje nga disa republikanë të zhgënjyer me qëndrimet e Trumpit.

Sondazhi i publikuar nga Washington Post dhe Universiteti George Mason pasqyron tendenca të ngjashme nga anketat e fundit, që tregojnë një garë të ngushtë në shtatë shtetet e pavendosura, edhe pse Harris ka një epërsi në nivel kombëtar. Sipas anketës, 49% e votuesve të mundshëm mbështesin Harris, ndërsa 48% Trumpin. Një sondazh tjetër i realizuar nga Reuters dhe Ipsos javën e kaluar tregoi një epërsi të qëndrueshme për Harris me 45% përballë 42% të Trumpit.

Megjithatë, rezultati në kolegjet zgjedhore të këtyre shteteve do të përcaktojë fituesin e zgjedhjeve të nëntorit. Shtatë shtetet e pavendosura pritet të jenë vendimtare, me sondazhet e votuesve të tyre që ofrojnë një tregues më të qartë të gjendjes aktuale të garës presidenciale.