Një ngjarje e rëndë është regjistruar në orët e para të mëngjesit në Gjakovë, ku një i ri ka humbur jetën pas një sulmi me thikë.

Sipas Policisë së Kosovës, rreth orës 02:20 në rrugën “Mbretëresha Teutë” ka ndodhur një përplasje mes disa personave, e cila ka përfunduar në mënyrë tragjike.

Viktima është identifikuar si Rexhë Brahimaj, i cili ka pësuar plagë të rënda nga goditjet me thikë. Ai është dërguar me urgjencë në Spitalin e Përgjithshëm të Gjakovës, por pavarësisht ndërhyrjes mjekësore nuk ka mundur të mbijetojë.

Zëdhënësi i Policisë për rajonin e Gjakovës, Sheremet Elezaj, ka bërë të ditur se rrethanat e ngjarjes janë ende nën hetim dhe se po punohet për zbardhjen e plotë të saj.

Sipas informacioneve paraprake, dyshohet se ngjarja ka ardhur pas një mosmarrëveshjeje mes palëve të përfshira.

Ndërkohë, një person i dyshuar është vetëdorëzuar në polici dhe po merret në pyetje nga hetuesit, ndërsa autoritetet po vijojnë punën për të sqaruar motivet dhe dinamikën e plotë të krimit.