Deputeti demokrat Agron Gjekmarkaj pati një përplasje të ashpër me ministrin Blendi Gonxhe gjatë një seance të Komisionit të Edukimit, ku shprehu pakënaqësinë e tij për trajtimin e figurave të rëndësishme të kulturës dhe letërsisë shqiptare. Në mënyrë të veçantë, ai kritikoi ceremoninë që u mbajt për Ismail Kadarenë pas vdekjes dhe mungesën e vëmendjes ndaj At Zef Pllumit në 100-vjetorin e tij.

Gjekmarkaj filloi duke vënë në dukje se ceremonia në nder të Kadaresë, shkrimtarit të njohur botërisht dhe përkthyer në mbi 48 gjuhë, ishte krejt e papërshtatshme për një personalitet të përmasave të tij. Sipas tij, Kadare nuk duhej të ishte varrosur në Tufinë, duke e krahasuar atë vend me një rrugë “si në Kandahar”, që nuk reflekton aspak madhështinë e figurës së shkrimtarit. “Ikja e Kadaresë është një nga më të mëdhatë që ky komb ka patur ndonjëherë,” theksoi Gjekmarkaj, duke kërkuar një vend të denjë dhe të përhershëm për prehjen e Kadaresë. Ai po ashtu sugjeroi hapjen e një konkursi ndërkombëtar për të përcaktuar vendin ku shkrimtari i madh duhet të prehet.

Në vijim, deputeti demokrat ngriti shqetësimin për harresën e figurës së At Zef Pllumit, autorit të njohur të veprës “Rrno vetëm për me tregue”, në 100-vjetorin e lindjes së tij. Ai kritikoi qeverinë dhe Ministrinë e Kulturës për mungesën e çdo përkujtimi zyrtar, madje edhe një status hipokrit në rrjetet sociale, që siç vuri në dukje ai, ndodh shpesh për raste të tilla. Sipas Gjekmarkajt, ky vit duhej të ishte shpallur “Viti i At Zef Pllumit”, duke nderuar kështu një njeri që përmes kujtimeve të tij ka dëshmuar për vuajtjet dhe krimet e regjimit komunist, një figurë që i dha qytetërimit shqiptar një zë të fuqishëm përballë tiranisë.

Deputeti vazhdoi duke theksuar se mungesa e reflektimit dhe ndarjes etike për periudhën e komunizmit tregon paaftësinë dhe keqdashjen e burokratëve në komunikimin e tyre me shoqërinë shqiptare. Ai nuk kërkoi lufte klasash apo ndëshkimin e brezave pasardhës për krimet e së kaluarës, por një distancim moral dhe reflektim të thellë mbi ato ngjarje historike.

Sipas tij, ribotimi i veprës së At Zef Pllumit dhe sensibilizimi i shoqërisë për mesazhet e tij janë të domosdoshme. Ai përmbylli fjalën e tij duke theksuar rëndësinë e nderimit të figurave si Kadareja dhe At Zef Pllumi për ruajtjen e vlerave të kulturës dhe historisë shqiptare.