Gjykata e Posaçme kundër Korrupsionit dhe Krimit të Organizuar ka vendosur masën e sigurisë “arrest në burg” për Emiljan Burbën, i arrestuar pas hetimeve të zhvilluara nga SPAK.

Sipas raportimeve nga seanca gjyqësore, prokurori i çështjes, Adnan Xholi, deklaroi se Burba dyshohet se drejton një grup të strukturuar kriminal të përfshirë në trafikimin ndërkombëtar të lëndëve narkotike.

Sipas prokurorisë, aktiviteti kriminal dyshohet se shtrihej nga Shqipëria drejt Malit të Zi me destinacion final Gjermaninë, nga Shqipëria drejt Turqisë, si dhe nga vendet e Amerikës së Jugut drejt vendeve të Bashkimit Evropian.

Një ditë më parë, Prokuroria e Posaçme njoftoi arrestimin e tij, ndërsa bëri me dije se hetimet për procedimin penal të regjistruar në janar të vitit 2024 janë zhvilluar në bashkëpunim me autoritete të huaja të drejtësisë.

Në hetime kanë marrë pjesë edhe Byroja Kombëtare e Hetimit, Policia Kriminale, ndërsa procesi është mbështetur nga organizatat ndërkombëtare Eurojust dhe Europol.

Çështja vijon të jetë nën hetim, ndërsa autoritetet po punojnë për zbardhjen e plotë të veprimtarisë së dyshuar kriminale dhe personave të tjerë të përfshirë.