Një gjykatë në Ankara ka vendosur lirimin e gazetarit të Shërbimit Turk të Deutsche Welle, Alican Uludag, gjatë seancës së tij të parë dëgjimore, pas rreth tre muajsh paraburgim.

Uludag ishte arrestuar për postime në rrjetet sociale që autoritetet turke dyshonin se kishin në shënjestër presidentin e Turqisë. Ai u mbajt në burgun Silivri, jashtë Stambollit, ndërsa procesi gjyqësor u transferua më pas në Ankara për shkak të mungesës së juridiksionit.

Seanca u zhvillua në Gjykatën e Shkallës së Parë në Ankara, ku gazetari u paraqit përmes një sistemi videokonference nga burgu Marmara.

Në mbrojtjen e tij, Uludag mohoi akuzat dhe tha se po ndiqet për shkak të aktivitetit të tij profesional.

“Kam qenë larg familjes dhe punës sime për 90 ditë. Po gjykohem pa qenë në gjendje të marr pjesë në gjykatë. Kjo është shkelje e të drejtës sime për mbrojtje,” u shpreh ai.

“Unë praktikoj gazetari, jo krim,” theksoi Uludag, duke shtuar se nuk ka kryer asnjë vepër penale dhe se çështja lidhet vetëm me postimet e tij në internet.

Gjykata vendosi lirimin e tij në përfundim të seancës, duke mbyllur fazën e parë të procesit gjyqësor.