Trajneri i Manchester City-t, Pep Guardiola, ka kërkuar nga skuadra e tij që të jetë shumë e kujdesshme ndaj Real Madridit, duke e cilësuar si një ekip që bëhet edhe më i rrezikshëm kur përballet me vështirësi.

“Qytetarët” do të presin “Los Blancos” në stadiumin “Etihad” të martën në mbrëmje, në sfidën e parë të raundit eliminator të Ligës së Kampionëve. Kjo është hera e katërt radhazi që dy ekipet përballen në këtë fazë të kompeticionit, që nga viti 2020.

Në konferencën për shtyp përpara takimit, Guardiola u shpreh:
“Jemi përballur shpesh me ta dhe e dimë se në momentet më të vështira ata japin më të mirën e tyre! Duhet të bëjmë dy ndeshje të mira që të kualifikohemi!”

Reali nuk do të ketë të disponueshëm për këtë përballje mbrojtësit Carvajal, Rüdiger, Militão dhe Alaba, një mungesë e rëndësishme për skuadrën e Ancelottit. Megjithatë, Guardiola pranoi se sulmuesit e madrilenëve janë të jashtëzakonshëm dhe shumë të zotë me topin, duke theksuar se ndalja e tyre do të jetë një sfidë e vështirë.

Ndërkohë, Manchester City ndodhet në një pozitë jo të favorshme në Premier League, ku renditet në vendin e pestë, me 15 pikë më pak se Liverpool-i kryesues. Për këtë arsye, Guardiola dhe skuadra e tij do të përqendrohen maksimalisht në Champions League, duke synuar një fitore të rëndësishme në përballjen e parë ndaj Realit.