Los Angeles – Këngëtarja, kompozitorja dhe aktorja e njohur amerikane, Halle Bailey, ka paraqitur një kërkesë për urdhër mbrojtjeje ndaj ish-partnerit të saj, reperit Darryl Dwayne Granberry Jr., i njohur si DDG, duke e akuzuar për dhunë fizike dhe abuzim të vazhdueshëm, madje edhe pas ndarjes së tyre.

Sipas dokumenteve gjyqësore të siguruara nga Page Six, Halle pretendon se është përballur me disa raste dhune, që kulmuan me një incident të rëndë në janar të këtij viti, kur reperi erdhi për të marrë djalin e tyre, Halo. Sipas saj, një debat mbi orarin e vizitave degjeneroi në dhunë fizike, ku DDG e tërhoqi nga flokët dhe e përplasi me fytyrën në timon, duke i shkaktuar një dhëmb të thyer dhe mavijosje të shumta.

E shqetësuar për sigurinë e fëmijës, Halle vendosi të mos e linte djalin vetëm me të atin në atë gjendje dhe e la përkohësisht në kujdesin e familjes së DDG-së. Ajo i paraqiti gjykatës fotografi të dëmtimeve fizike si provë.

Në një tjetër incident të ndodhur në mars, DDG dyshohet se hyri pa leje në shtëpinë e Halle-së, i dërgoi një fotografi të shtratit të saj me një mesazh që ajo e interpretoi si një akuzë për pabesi. Disa ditë më vonë, ai u kthye në banesë, i bërtiti, shkatërroi kamerën e sigurisë dhe hodhi telefonin e saj nga makina.

Sipas akuzës së saj, përndjekja vazhdoi edhe fundjavën e kaluar, kur reperi e akuzoi se po udhëtonte me këngëtarin Brent Faiyaz, edhe pse ajo kishte sqaruar se donte të kalonte Ditën e Nënës në qetësi me djalin e saj.

Gjykata miratoi një urdhër të përkohshëm mbrojtjeje, që ndalon reperin të afrohet më shumë se 100 metra nga Halle Bailey dhe djali i tyre, si dhe ndalon çdo kontakt, të drejtpërdrejtë apo të tërthortë.

Ngjarja ka tronditur publikun dhe fansat e Bailey, e cila prej kohësh konsiderohet një nga zërat më premtues të brezit të ri në muzikë dhe kinematografi. Reperi DDG ende nuk ka bërë një deklaratë publike mbi akuzat.