Kryetarja e Kuvendit të Kosovës dhe ushtruesja e detyrës së Presidentes, Albulena Haxhiu, ka reaguar ndaj deklaratave të presidentit serb Aleksandar Vuçiq dhe kryetares së Kuvendit të Serbisë, Ana Bërnabiq, duke i cilësuar ato si retorikë shoviniste dhe revizioniste.

Haxhiu ka deklaruar se Serbia nuk mund të pretendojë angazhim për paqe dhe normalizim të marrëdhënieve me Kosovën, ndërsa, sipas saj, vazhdon të mohojë shtetësinë e Kosovës dhe nuk bashkëpunon për zbardhjen e krimeve të luftës dhe fatin e personave të zhdukur.

“Këto deklarata janë vazhdim i gjuhës së mohimit, urrejtjes dhe propagandës mbi të cilën u ngrit politika shoviniste dhe ekspansioniste e regjimit të Millosheviqit”, tha Haxhiu.

Ajo theksoi se pavarësia e Kosovës është një realitet i pakthyeshëm dhe se deklaratat politike nuk mund ta ndryshojnë atë.

“Kosova është shtet i pavarur dhe sovran që nga 17 shkurti 2008. Ky realitet nuk zhbëhet me deklarata politike”, u shpreh Haxhiu.

Sipas saj, Gjykata Ndërkombëtare e Drejtësisë në vitin 2010 ka konstatuar se shpallja e pavarësisë së Kosovës nuk ka shkelur të drejtën ndërkombëtare, ndërsa Kosova vijon të forcojë pozitën e saj në arenën ndërkombëtare.

Haxhiu u bëri thirrje Shteteve të Bashkuara të Amerikës dhe Bashkimit Evropian që të reagojnë ndaj, siç e cilësoi ajo, “gjuhës shoviniste, revizioniste dhe nxitëse” të përdorur nga zyrtarët serbë.

Deklaratat e saj vijnë pas reagimeve të fundit nga Beogradi, të cilat kanë rikthyer në qendër të debatit çështjen e Kosovës dhe marrëdhëniet mes dy vendeve.