Sulmuesit argjentinas Mauro Icardi i është pezulluar e drejta për të drejtuar automjetin, pasi partnerja e tij publikoi një video ku shfaqeshin disa shkelje të rregullave të qarkullimit, mes tyre edhe drejtimi i automjetit me patentë të skaduar, sipas raportimeve.

Sipas të dhënave të raportuara, pezullimi paraprak i patentës përfundon më 1 janar 2099. Ministria e Transportit ka deklaruar se shkelja e rregullave të sigurisë, ndërsa automjeti ishte në lëvizje, mund të sjellë heqjen e patentës dhe se futbollisti duhet t’i nënshtrohet një testi për të rikthyer të drejtën e drejtimit.

Në videon e publikuar nga partnerja e Icardit, ajo shfaqet gjithashtu pa rrip sigurimi dhe me më shumë se gjysmën e trupit jashtë dritares së automjetit.

“Vendosëm pezullimin paraprak. Përpara se të marrë një patentë të re, ai duhet t’i nënshtrohet një vlerësimi për të përcaktuar nëse është i aftë të drejtojë automjet. Siguria rrugore nuk lejon përjashtime”, deklaroi institucioni.

Ndërkohë, Icardi ka reaguar ndaj vendimit, duke akuzuar qeverinë për kërkim të vëmendjes mediatike. Futbollisti pretendon se patenta e tij ishte e vlefshme deri në vitin 2029.

“Ndaloni së gënjyeri njerëzit dhe filloni të punoni. Patenta argjentinase duhet të dorëzohet kur e konvertoni në një patentë evropiane. Çfarë lloj pezullimi po përpiqeni të shpikni?”, tha Mauro Icardi.