Presidenti i Partisë së Lirisë, Ilir Meta, gjatë një mbledhjeje të Kryesisë të Partisë së Lirisë, ka komentuar heqjen e mandatit të Fredi Belerit dhe dekretimin e datës së zgjedhjeve në Himarë. Meta akuzoi kreun e SPAK, Altin Dumanin, duke e quajtur “torollaku që jep intervista off record”.

Meta theksoi se narkoshteti i drejtuar nga Edi Rama dhe reforma e tij e drejtësisë, që ai e quajti “Ramaforma”, është përgjegjëse për shpalljen e pavlefshmërisë së mandatit të kryetarit të zgjedhur të Himarës, Fredi Beleri. Meta pretendoi se Beleri është burgosur politikisht për të penguar betimin e tij dhe se data e zgjedhjeve në Himarë u dekretua me shpejtësi, pa pritur afatin e apelimit, çka tregon kapjen totale të shtetit dhe drejtësisë nga qeveria dhe mafia ndërkombëtare që pastron para në Shqipëri.

Meta kritikoi gjithashtu institucionet e shtetit për mungesën e reagimit në rastet e emergjencave kombëtare si tërmeti tragjik dhe pandemia e COVID-19. Ai akuzoi SPAK-un për mosveprim ndaj Edi Ramës, duke pretenduar se Engjëll Agaçi, sekretari i përgjithshëm, është shefi i vërtetë i SPAK-ut dhe se ai ka koordinuar çdo hap procedural në rastin e Himarës për të realizuar projektet personale të Edi Ramës.

“SPAK-u torollaku e ka qepur gojën dhe as nuk guxon t’ia thotë emrin kryeministrit, jo më ta thërrasë apo t’i vërë prangat, kur të gjitha faktet janë atje bashkë,” përfundoi Meta.