Më shumë se 10,000 persona janë arrestuar gjatë 15 ditëve të fundit në Iran, në kuadër të demonstratave të dhunshme anti-regjim që kanë përfshirë të gjithë vendin. Shifrat janë bërë publike të dielën nga Skylar Thompson, zëvendësdrejtor i Aktivistëve të të Drejtave të Njeriut në Iran (HRANA).

“Deri tani kemi konfirmuar të paktën 10,675 persona të arrestuar, mes tyre 169 fëmijë,” deklaroi Thompson për CNN, duke theksuar se bilanci mund të rritet për shkak të vështirësive në verifikimin e të dhënave.

Sipas raportit më të fundit të HRANA-s, 490 protestues janë vrarë gjatë së njëjtës periudhë, ndërsa protestat kanë hyrë tashmë në javën e tretë dhe janë shtrirë në të 31 provincat e Iranit.

Situata në vend mbetet e tensionuar, ndërsa autoritetet iraniane kanë ndërprerë aksesin në internet për të katërtën ditë radhazi, në një përpjekje për të kufizuar komunikimin dhe shpërndarjen e informacionit mbi zhvillimet në terren.