Detaje të reja kanë dalë në dritë pas ngjarjes së rëndë që tronditi opinionin publik, ku 25-vjeçari Marjan Kodheli masakroi me thikë mesditën e së martës të atin e tij, 69-vjeçarin Pjetër Kodheli, në banesën e familjes në fshatin Shkallnur, Durrës.

Autori ka dhënë një rrëfim të detajuar për hetuesit, duke përshkruar momentin e krimit:

“Ishim duke ngrënë bukë dhe babai më turr. Nuk më linte të haja i qetë. Nuk e mbaj mend pse ndodhi, por kemi pasur grindje të vazhdueshme që kur jam kthyer nga Greqia, para gjashtë muajsh. Kam jetuar në Francë, jam me pasaportë franceze. Atje kam qëndruar rreth gjashtë vjet dhe më pas kam shkuar në Greqi, ku kam punuar për gjashtë muaj. Nga Greqia jam kthyer në shtëpi dhe isha i papunë. Kemi pasur debate me babain. Sherri ndodhi teksa hanim drekë. Nuk e di si ndodhi, mora thikën dhe e qëllova.”

Hetimet kanë zbuluar se fillimisht Marjani ka goditur të atin me një copë druri pas koke dhe më pas me thikën e bukës, duke e qëlluar në zemër. Pas krimit, dyshohet se e la thikën mbi tavolinë dhe u largua nga vendngjarja.

Sipas informacionit të siguruar, dy vite më parë viktima kishte deklaruar se djali nuk kishte probleme të shëndetit mendor dhe nuk kishte nevojë për trajtim. Megjithatë, mjekja që e vizitoi atë kishte këshilluar një vizitë te psikiatri për vlerësim më të thellë, të cilën as ai dhe familja nuk e pranuan.

Banorët e fshatit e përshkruajnë familjen Kodheli si të qetë dhe pa probleme, megjithatë djali kishte emigruar që në moshë të re. Ngjarja ka tronditur komunitetin lokal, ndërsa hetimet për rrethanat dhe motivet e krimit vazhdojnë.