Deputetja e Partisë Demokratike Ina Zhupa ka reaguar publikisht ndaj deklaratave të kryetarit të grupit parlamentar të Partisë Socialiste Taulant Balla, duke e akuzuar për qëndrime të ndryshme në raport me vendimet e gjykatave.

Në një reagim në rrjetet sociale, Zhupa thekson se Balla nuk mund të kritikojë gjyqtarët për vendimet e tyre, ndërsa më herët, sipas saj, ka mbështetur dhe njohur vendimet e gjykatës administrative në cilësinë e ministrit.

“Taulant Balla përpara se të bëjë video selfie duke anatemuar gjyqtarët për vendimet e tyre, le të kujtojë qëndrimet e tij si ministër, kur njihte dhe respektonte vendimet e gjykatës administrative”, shkruan Zhupa.

Ajo shton se bëhet fjalë për të njëjtin “kazus ligjor” dhe për vendime të dhëna nga i njëjti gjyqtar, duke ngritur pretendimin se qëndrimet politike ndaj gjyqësorit po ndryshojnë sipas interesit të momentit.

Në deklaratën e saj, Zhupa akuzon gjithashtu maxhorancën se po vepron sikur institucionet të ishin të kontrolluara politikisht, duke theksuar se “Parlamenti nuk mund të funksionojë si seksion partie”.

Deklaratat vijnë në një klimë të tensionuar politike, ku debatet mes opozitës dhe mazhorancës për rolin e gjyqësorit dhe vendimmarrjet e tij kanë qenë të vazhdueshme.