Gazetarja Klodiana Lala ka ngritur shqetësime mbi një konflikt të rëndë mes biznesmenit Idajet Ismailaj dhe ortakut të tij Sokol Agalliu, i cili është edhe nipi i tij.

E ftuar në emisionin “Të Paekspozuarit” në MCN TV, Lala tha se ngjarja është serioze dhe se palët kanë përfunduar me kallëzime të ndërsjella, ndërsa Agalliu ka marrë ndihmë mjekësore në spital.

Sipas saj, përplasja ka ndodhur në ambientet e zyrave të bizneseve dhe lidhet me konflikte financiare dhe pronësie, përfshirë pretendime për humbje të mëdha dhe abuzime me pasuri të paluajtshme.

Në studio, moderatori Ylli Rakipi dhe të ftuarit ngritën shqetësime për mënyrën e trajtimit të rastit.

“Kur rrihen fakirët, lajmërohet policia. Këtu tani, u dha ndonjë njoftim?” – u shpreh Rakipi gjatë diskutimit.

Nga ana e saj, Lala theksoi se deri më tani nuk ka pasur reagim zyrtar nga Policia e Shtetit dhe se marrja e kallëzimit ka qenë e vështirë, duke ngritur pikëpyetje për mënyrën e menaxhimit të rastit.

Ajo shtoi se palët kanë paraqitur pretendime të kundërta për dhunë dhe abuzime financiare, ndërsa hetimet vijojnë për të sqaruar rrethanat e konfliktit.

Sipas deklarimeve në studio, janë ngritur edhe pretendime për mungesë transparence dhe për zhdukje të materialeve filmike nga vendngjarja, por këto mbeten ende të pakonfirmuara zyrtarisht.