Kandidatja demokrate për presidente, Kamala Harris, mbylli fushatën zgjedhore me një fjalim në sheshin pranë Shtëpisë së Bardhë, ku bëri thirrje për një gjeneratë të re lidershipi në Shtetet e Bashkuara. Ajo e përdori këtë mundësi për të paralajmëruar amerikanët për rreziqet që do të sillte rikthimi i Donald Trump në presidencë.

“Ne e dimë se kush është Donald Trump. Ai që dërgoi një turmë të armatosur në Kapitol në përpjekje për të përmbysur humbjen në zgjedhjet presidenciale të vitit 2020. Ai është i paqëndrueshëm, i fiksuar pas hakmarrjes dhe në kërkim të pushtetit të pakontrolluar,” tha Harris.

Ajo e theksoi se këto janë zgjedhje mes lirisë dhe ndarjes, duke premtuar se do të jetë presidente për të gjithë amerikanët. “Në ditën e parë, nëse zgjidhej, Donald Trump do të hynte në atë zyrë me një listë armiqsh. Ndërsa nëse zgjidhem unë, do të hyj me një listë detyrash plot prioritete se çfarë do të bëj për popullin amerikan,” u shpreh ajo.

Harris përsëriti se, nëse zgjidhet nga votuesit, administrata e saj nuk do të jetë një vazhdim i presidencës së Joe Biden. “Të shërbeja si zëvendëspresidente e Bidenit ka qenë një nder. Por kjo nuk do të përcaktojë administratën time apo objektivat e mia në detyrë. Presidenca ime do të jetë ndryshe sepse sfidat me të cilat përballemi janë të ndryshme,” tha ajo.

Në moshën 60-vjeçare, Kamala Harris do të bëhej presidentja e parë grua nëse zgjidhet, ndërsa Donald Trump, 78 vjeç, do të bëhej kandidati më i moshuar që zgjidhet president. Të dy kandidatët dallojnë në një sërë çështjesh, përfshirë mbështetjen për Ukrainën, aleancën ushtarake të NATO-s, emigracionin, të drejtat e abortit dhe taksat mbi të pasurit.