Kapiteni i jahtit luksoz Bayesian, që u mbyt pranë Porticello në brigjet e Siçilisë javën e kaluar, do të përballet me një hetim mbi akuzat e mundshme të vrasjes nga pakujdesia dhe mbytjes së anijes nga pakujdesia, sipas një njoftimi të hënën nga zyra e prokurorit italian.

James Cutfield, 51 vjeç, ishte kapiten i ekuipazhit në bordin e jahtit me vela 56 metra kur ajo u përmbyt nga një stuhi e egër mëngjesin e së hënës që kaloi, duke shkaktuar vdekjen e gjashtë personave. Mes viktimave janë manjati britanik Mike Lynch dhe vajza e tij 18-vjeçare, Hannah.

Të tjerë që humbën jetën ishin kuzhinieri i jahtit, Recaldo Thomas; drejtori i Morgan Stanley International, Jonathan Bloomer; avokati i shquar amerikan Chris Morvillo; dhe dy gratë e tyre, Judy Bloomer dhe Neda Morvillo.

Cutfield dhe 14 persona të tjerë i mbijetuan fundosjes, përfshirë gruan e Lynch, Angela Bacares. Hetimet italiane sugjerojnë se një fenomen i motit i njohur si rrjedhje uji, një nga disa llojet e tornadove, mund të ketë përmbysur jahtin. Megjithatë, autoritetet janë duke hetuar nëse veprimet e ekuipazhit dhe trajtimi i varkës kontribuan në këtë tragjedi.

Cutfield, i lindur në Zelandën e Re, nuk është në paraburgim, sipas prokurorëve italianë, por ai nuk mund të largohet nga vendi ndërkohë që hetimet janë në vazhdim. Ligji detar e ngarkon kapitenin me përgjegjësinë e plotë për anijen, ekuipazhin dhe të gjithë personat në bord.

Të vrarët, sipas prokurorëve, ka të ngjarë të ishin duke fjetur në momentin e stuhisë, që mund të ketë ndikuar në paaftësinë e tyre për të shpëtuar. Në fundjavë, një prokuror dhe kreu i ekipit të rikuperimit të zjarrfikësve raportuan se pesë trupa u gjetën në të njëjtën dhomë të anijes, duke sugjeruar se ata mund të ishin duke kërkuar një xhep ajri ndërsa anija u fundos.

Hetuesit kanë paralajmëruar se rrethanat e mbytjes mbeten kryesisht të paqarta, përfshirë nëse kishte një kuti të zezë në bordin e anijes dhe nëse disa nga kapakët e anijes ishin lënë të hapura, çka mund të kishte shpjeguar shpejtësinë e fundosjes.