Një tragjedi e rëndë ka tronditur komunitetin e alpinistëve në Greqi, pasi katër burrat që kishin nisur ngjitjen në malet Vardousia, në Fokida, u gjetën të vdekur pas dy ditësh kërkimesh intensive. Autoritetet konfirmuan se viktimat u kapën nga një ortek në një zonë jashtëzakonisht të rrezikshme, pak para majës së malit Korakas.

Ekspertët e shpëtimit dhe alpinistët lokalë shpjeguan se kushte të tilla, me pjerrësi të forta dhe borë të paqëndrueshme, mund të shkaktojnë orteke edhe nga zhurma më e vogël. Sipas raportimeve, alpinistët u rrëmbyen papritur nga bora, pa mundësi për të reaguar, dhe u gjetën shumë pranë njëri-tjetrit, duke treguar se ngjarja ndodhi brenda pak çastesh.

Grupi kishte nisur ngjitjen në kushte relativisht të mira moti, por lartësia dhe morfologjia e veçantë e malit e bënë rrugën shumë të rrezikshme. Njëri prej alpinistëve njihte mirë itinerarin, pasi jetonte në fshatin Athanasios Diakos dhe e kishte ndjekur shpesh këtë rrugë. Hetimet e mëtejshme do të përqendrohen në rrethanat e saktë të ortekut dhe masat e sigurisë në zonë.