Katër shqiptarë janë arrestuar nga autoritetet zvicerane në kantonin Graubünden, për shpërndarje droge, pas hetimeve që kanë zgjatur nga gushti deri në tetor të këtij viti. Të arrestuarit janë burra me moshë nga 19 deri në 39 vjeç, të cilët janë identifikuar pas një sërë veprimesh të kryera nga policia kantonale dhe prokuroria publike e Graubünden.

Arrestimet filluan në fund të gushtit, kur një 21-vjeçar u kap në Domat/Ems, duke shpërndarë drogë. Menjëherë pas tij, një tjetër shqiptar 19-vjeçar u arrestua në Felsberg, ndërsa në fund të tetorit, u arrestuan një 25-vjeçar në Bonaduz dhe një 39-vjeçar në Maienfeld.

Gjatë operacionit, autoritetet sekuestruan 745 gramë heroinë, 315 gramë kokainë, 820 gramë paracetamol (një substancë që përdoret për prerjen e drogave) dhe një shumë të konsiderueshme parash prej 7.760 franga. Të katër të arrestuarit do të përgjigjen për akuzat e shpërndarjes së drogave, megjithatë, dy prej tyre janë dëbuar tashmë nga Zvicra.