Këshilli Bashkiak i Vlorës do të zhvillojë një mbledhje jashtë radhe ditën e hënë, më 20 prill 2026, në orën 10:00, në ambientet e Pallatit të Kulturës “Labëria”.

Sipas njoftimit zyrtar, mbledhja është thirrur nga Kryetari i Bashkisë dhe bazohet në Ligjin nr. 139/2015 “Për vetëqeverisjen vendore”. Në rendin e ditës janë përfshirë disa projektvendime me ndikim të drejtpërdrejtë në administrimin dhe shërbimet publike në qytet.

Ndër çështjet kryesore që pritet të diskutohen është projektvendimi për ndryshime në buxhetin e Bashkisë për vitin 2026, si dhe miratimi i tarifave për shërbimet në zonat e plazheve, të administruara nga njësitë vendore.

Në rend dite është edhe përcaktimi i vendqëndrimit të mjeteve që u janë vendosur masa administrative për shkelje të Kodit Rrugor, si dhe krijimi i një strehëze për kafshët endacake, së bashku me miratimin e akteve për funksionimin e saj.

Po ashtu, këshilli do të shqyrtojë ndryshime në vendimet e mëparshme që lidhen me numrin e punonjësve dhe nivelin e pagave në Bashki dhe institucionet në varësi për vitin 2026.

Paralelisht, më 17 prill, duke nisur nga ora 09:00, do të zhvillohen mbledhjet e komisioneve të përhershme, ku projektvendimet do të kalojnë në shqyrtim paraprak përpara se të hidhen për votim në mbledhjen plenare.