Rikthimi i Randal Kolo Muanit te Juventusi duket gjithnjë e më pranë, pasi klubi bardhezi ka arritur marrëveshjen me sulmuesin francez për një kontratë pesëvjeçare me pagë 5 milionë euro në sezon. Tashmë mbetet vetëm akordi mes Juventusit dhe Paris Saint-Germain për kartonin e lojtarit.

Sot pritet të zhvillohet një raund i ri negociatash mes drejtuesve të dy klubeve, ku tema kryesore do të jetë vlera e transferimit. Takimi nuk do të mbahet në Torino apo Paris, por në Rimini, aty ku mbrëmjen e sotme do të hapet zyrtarisht merkatoja verore e vitit 2026.

Drejtori i përgjithshëm i Juventusit, Giovanni Carnevali, do të takohet me një delegacion të PSG-së, ndërsa sipas mediave italiane, në takim mund të jetë i pranishëm edhe presidenti i klubit francez, Nasser Al-Khelaifi.

PSG ka vendosur dy kushte të qarta për largimin e Kolo Muanit: transferimi duhet të jetë përfundimtar, pa formulën e huazimit me të drejtë blerjeje, ndërsa çmimi i kartonit nuk duhet të jetë më i ulët se 40 milionë euro.

Nga ana tjetër, Juventusi është i gatshëm të pranojë një blerje të detyrueshme, por synon ta mbyllë operacionin për rreth 35 milionë euro, përfshirë bonuset.

Marrëdhëniet e mira mes Giovanni Carnevalit dhe drejtorit sportiv të PSG-së, Luis Campos, konsiderohen një faktor që mund të ndihmojë në arritjen e marrëveshjes, ndërsa optimizmi mbetet i lartë në të dy kampet.

Edhe trajneri i Juventusit, Luciano Spalletti, po ndjek me interes zhvillimet. Ai dëshiron ta ketë Kolo Muanin në dispozicion që në fillimin e grumbullimit më 13 korrik në Continassa, ose të paktën përpara nisjes së turneut veror të skuadrës në Hong Kong dhe Perth.