Presidenti rus Vladimir Putin ka deklaruar se Rusia do të vazhdojë ofensivën ushtarake në Ukrainë derisa të marrë nën kontroll të plotë katër rajonet që Moska pretendon se i ka aneksuar, duke refuzuar një propozim të Kievit për një deeskalim të pjesshëm të konfliktit.

Në një intervistë për televizionin shtetëror rus, Putin tha se Ukraina kishte propozuar pezullimin e ndërsjellë të sulmeve me rreze të gjatë veprimi, por sipas tij kjo synon vetëm t’u japë kohë forcave ukrainase të rigrupohen.

“Është e qartë pse po bëhet ky propozim, sepse hakmarrja jonë thellë brenda territorit ukrainas është shumë më e fortë, ka një ndikim më të madh dhe është më shkatërruese”, u shpreh ai.

Putin theksoi se objektivi i Rusisë mbetet “çlirimi i plotë” i rajoneve të Donetskut, Luhanskut, Zaporizhias dhe Khersonit, të cilat Moska i shpalli të aneksuara në vitin 2022, megjithëse nuk i kontrollon ende plotësisht.

Presidenti rus pranoi gjithashtu se sulmet me dronë ukrainas ndaj infrastrukturës energjetike ruse kanë shkaktuar mungesa karburanti në disa rajone, por këmbënguli se ato nuk kanë ndikuar në operacionet ushtarake në vijën e frontit.

Në planin diplomatik, Putin tha se Moska pret rifillimin e kontakteve me Shtetet e Bashkuara pasi të ulen tensionet në Lindjen e Mesme dhe nuk përjashtoi takime të reja me të dërguarit amerikanë.

Ai shtoi se gjatë kontakteve të mëparshme janë diskutuar skenarë të ndryshëm për përfundimin e luftës, por pa u arritur një marrëveshje.

Presidenti rus hodhi poshtë edhe një herë kërkesën e presidentit ukrainas, Volodymyr Zelensky, për një takim të drejtpërdrejtë, duke e cilësuar një takim të tillë si të panevojshëm në kushtet aktuale.