Gjykata e Kasacionit në Itali ka lënë në fuqi dënimin me 30 vite burg për Elona Kalesha, 42 vjeçe, e akuzuar për vrasjen e dyfishtë dhe përdhosje të kufomës, në lidhje me zhdukjen dhe vrasjen e prindërve të ish-partnerit të saj në Firence.
Me vendimin e fundit, gjykata rrëzoi ankimin e mbrojtjes dhe pranoi kërkesën e prokurorisë për të lënë në fuqi vendimet e mëparshme, duke e bërë dënimin përfundimtar.
Ngjarja daton në vitin 2015, kur Teuta Pasho dhe Shpëtim Pasho u zhdukën në mënyrë misterioze. Pesë vite më vonë, në dhjetor 2020, mbetjet e tyre u gjetën të copëtuara në katër valixhe, të hedhura pranë superstradës Firence–Pisa–Livorno dhe zonës së burgut të Solliccianos.
Edhe në vitin 2025, Gjykata e Apelit kishte konfirmuar dënimin me 30 vite burg, duke refuzuar kërkesën e prokurorisë për burgim të përjetshëm, si dhe atë të mbrojtjes për shpalljen e pafajësisë.
