Policia e Korçës njofton se, në kuadër të operacionit të koduar “Aktiviteti”, është arrestuar shtetasi Luan Sulstarova, 54 vjeç, banues në Pogradec dhe zjarrfikës në këtë qytet, i dyshuar për shpërndarje të lëndëve narkotike.

Specialistët e Seksionit për Hetimin e Narkotikëve të DVP Korçë, pas hetimeve me metoda proaktive dhe kontrolleve intensive, evidentuan se Sulstarova përdorte lokalin e tij për të ushtruar aktivitetin e paligjshëm. Gjatë kontrollit në ambientin e administruar nga ai, policia gjeti një sasi lënde narkotike të dyshuar kanabis, një pjesë e së cilës ishte ndarë në doza gati për shitje, një shumë parash që dyshohet të jetë e fituar nga aktiviteti kriminal, si dhe dy aparate celularë.

Materialet procedurale i janë referuar Prokurorisë së Korçës për veprime të mëtejshme. Operacioni synoi goditjen dhe parandalimin e veprimtarive kriminale në fushën e narkotikëve dhe është pjesë e kontrolleve të vazhdueshme që Drejtoria Vendore e Policisë së Korçës zhvillon për të mbajtur nën kontroll trafikun e drogës në zonë.