Një ngjarje makabre ka tronditur Holandën, ku një 18-vjeçare siriane u vra brutalisht nga vëllezërit e saj, në një krim që autoritetet e cilësojnë si “vrasje nderi”. Viktima është identifikuar si Ryan Al-Jayar, e cila, sipas hetimeve, u ekzekutua pasi babai i saj e konsideronte një “turp familjar” lidhjen e saj sentimentale.

Tragjedia ndodhi në maj të vitit 2024. Ryan u largua nga banesa familjare në Jura më 22 maj dhe gjashtë ditë më vonë u gjet e pajetë në një kënetë në Lelystad. Pamja që gjetën ekspertët mjeko–ligjorë ishte e tmerrshme: vajza kishte gojën e mbyllur me shirit ngjitës, duart e lidhura pas shpine dhe kyçet e këmbëve të lidhura. ADN e babait të saj u gjet nën thonjtë e viktimës, duke treguar se ajo ka luftuar deri në momentet e fundit.

Dy vëllezërit, Mohammed (23 vjeç) dhe Muhannad (25 vjeç), u arrestuan dhe dolën para gjykatës këtë të enjte. Të dy pretendojnë se krimi është kryer nga babai i tyre, i cili prej kohësh kishte udhëtuar drejt Sirisë.

Nga Siria, babai i dërgoi dy email-e gazetës holandeze De Telegraaf, duke marrë përsipër vrasjen dhe duke deklaruar se djemtë e tij janë të pafajshëm. Por prokurorët nuk e besojnë këtë version. Sipas tyre, ai është autori moral i krimit dhe personi që urdhëroi rrëmbimin dhe mbytjen e 18-vjeçares, ndërsa djemtë e ekzekutuan planin.

Babai pritet të gjykohet në mungesë, ndërsa hetimet vazhdojnë për të ndriçuar çdo rrethanë të ngjarjes që ka shokuar opinionin publik holandez dhe më gjerë.