Vetëm gjashtë ekzemplarë të roadster-it legjendar Mercedes-Benz CLK GTR ekzistojnë në planet, dhe një prej tyre ka përfunduar në një vend të pazakontë: në duart e FBI-së. Agjentët federalë sekuestruan supermakinën 13 milionë dollarëshe gjatë operacionit ndërkombëtar “Giant Slalom”, që ka në shënjestër ish-kampionin olimpik dhe të arratisurin famëkeq Ryan Wedding.

Wedding, dikur një yll i sportit të snowboard-it, sot është i akuzuar si drejtues i një karteli shumëkombësh kokaine, me të ardhura të paligjshme që, sipas autoriteteve amerikane, kapin shifrën marramendëse 1 miliard dollarë në vit. Hetuesit e krahasojnë atë me emra të errët si Escobar dhe El Chapo, ndërsa besohet se fshihet në Meksikë. Për kapjen e tij, FBI ka vënë në dispozicion një shpërblim rekord prej 15 milionë dollarësh.

Në mesin e pasurisë së sekuestruar spikat pikërisht CLK GTR Roadster 2002, një ikonë absolute e automobilizmit. I ndërtuar nga AMG në fund të viteve ’90 për homologimin e garave të Le Mans, modeli është fryt i një epoke kur prodhuesit ishin të detyruar të krijonin edhe versione rrugore të “përbindëshave” të pistës. Kështu lindën makinat legjendare si Porsche 911 GT1, Nissan R390 dhe sigurisht, Mercedes-Benz CLK GTR.

Nga 28 njësi të prodhuara, vetëm 6 janë roadster – duke e bërë këtë variant pa tavan një thesare të vërtetë për koleksionistët. Pas karrocerisë prej fibrash karboni fshihet një V12 6.0 litra që gjeneron rreth 600 kuaj fuqi, një motor i aftë të ngjitet deri në 7,000 rpm, duke e renditur këtë model mes ikonave më të egra të historisë së automobilizmit.

FBI njofton se makina – një nga më të rrallat në botë – mund të dalë në ankand pas përfundimit të procesit ligjor. Ironikisht, çmimi i saj i mundshëm i shitjes do të ishte pothuajse i barabartë me shpërblimin që ofrohet për kapjen e njeriut që dikur e zotëronte.