Kryeministri Edi Rama ka mbledhur në selinë rozë kryesinë e Partisë Socialiste, ku fokusi i mbledhjes është miratimi i kandidaturës për zgjedhjet në bashkinë e Himarës më 4 gusht.
Vangjel Tavo, kandidatura e PS
Zgjedhjet e 4 gushtit në Himarë janë të pazakonta jo vetëm për zhvillimin e tyre në kulmin e sezonit turistik, por edhe për kohën e shkurtër të fushatës elektorale. Partia Socialiste duket se është e përgatitur të shkojë në zgjedhje me një kandidat, Prefektin Vangjel Tavo, megjithëse burimet nuk përjashtojnë ndonjë emër tjetër surprizë në momentet e fundit.
Në anën tjetër, situata është më e ndërlikuar për opozitën. Sali Berisha duhet të vendosë nëse do të përfshihet në betejën për këtë qytet apo do t’ja lërë PBDNJ-së. Kandidimi i djalit të Fredi Belerit nën siglën e PD-së duket i vështirë, ndërsa është më e mundshme që Vangjel Dule të dalë veçmas me këtë emër.
Pas regjistrimit të kandidatëve, fushata elektorale në Himarë do të fillojë zyrtarisht dhe do të mbyllet më 2 gusht, duke qenë një nga fushatat më të shkurtra ndonjëherë. Në Himarë do të votohet dhe numërohet në formën tradicionale, përmes letrës, ndërsa identifikimi i votuesve do të bëhet me aparatura elektronike. Në zgjedhjet e fundit, në këtë bashki morën pjesë rreth 7800 votues.
