Kryeministri Edi Rama ka zhvilluar një takim me shqiptarët që jetojnë në diasporën e New York-ut, ku shprehu vlerësimin dhe synimet e tij për zgjerimin e të drejtës së votës për diasporën. Gjatë fjalës së tij, Rama deklaroi:

“Kjo është një ditë shumë e posaçme për mua, që ndodhem këtu me ju, jo vetëm si bashkatdhetar përtej oqeanit, as si qytetar me të drejtë vote në Shqipëri, por tashmë edhe si votues për mundësinë e pjesëmarrjes në zgjedhje nga këtu, në Amerikë. Ky është një premtim i mbajtur,” u shpreh Rama.

Kryeministri theksoi rëndësinë e angazhimit të diasporës shqiptare në proceset demokratike të vendit dhe premtoi se në zgjedhjet e pranverës së ardhshme shqiptarët do të kenë mundësi të votojnë nga Amerika. Duke i ftuar bashkatdhetarët të mbështesin vizionin e tij për Shqipërinë e vitit 2030, Rama tha: “Dua votën tuaj nga Amerika për të realizuar Shqipërinë si anëtare të BE-së dhe për të ngritur së bashku flamurin e Skënderbeut dhe të Ismail Qemalit në Bruksel.”

Në takim, Kryeministri u shoqërua nga disa kolegë të tij, të cilët e mbështetën në këtë nismë për të përfshirë sa më shumë shqiptarë në vendimmarrjet e rëndësishme për të ardhmen e vendit.