Kryetari i njësisë administrative Fushë Kuqe, Kristo Martinaj, është arrestuar nga policia e Kurbinit pas dyshimeve se ka shpërdoruar detyrën dhe ka përfituar tokë në mënyrë të paligjshme. Sipas njoftimit të policisë, 55-vjeçari dyshohet se ka porositur individë të ndryshëm për të hedhur inerte në afërsi të lokalit të tij, në zonën e mbrojtur të lagunës së Patokut, për të fituar sipërfaqe të tokës.
Arrestimi ka ardhur pas hetimeve disa javore, të cilat janë zhvilluar nën drejtimin e Prokurorisë. Martinaj do të përballet me akuzat për “Shpërdorim detyre” dhe “Pushtim të tokës”. Materialet procedurale i janë dorëzuar Prokurorisë së Lezhës për veprime të mëtejshme.
Njoftimi:
Specialistët për Hetimin e Krimeve të Komisariatit të Policisë Kurbin, si rezultat i hetimeve të kryera për disa javë, në drejtimin e Prokurorisë, për një rast të shpërdorimit të detyrës, kanë ndaluar me inciativë shtetasin Kristo Martinaj, 55 vjeç, me detyrë kryetar i njësisë administrative Fushë Kuqe, Kurbin.
Ndalimi i këtij shtetasi u bë pasi nga veprimet hetimore dyshohet se ka porositur shtetas të ndryshëm, për të hedhur inerte në afërsi të lokalit të tij, në zonën e mbrojtur të lagunës së Patokut, me qëllim përfitimin e sipërfaqes së tokës.
Materialet procedurale i kaluan Prokurorisë së Lezhës, për veprime të mëtejshme, për veprat penale “Shpërdorimi i detyrës” dhe “Pushtimi i tokës”.
