Në 35-vjetorin e themelimit të Partisë Demokratike, kryetari historik i PD, Sali Berisha, nderoi themeluesit dhe kontribuuesit e kësaj force politike, duke theksuar rëndësinë e kujtesës dhe trashëgimisë së tyre.
“Të dashur qytetarë dhe qytetare të pranishëm sonte në këtë takim, por dhe kudo që ndodheni. Të nderuar demokratë dhe demokrate të pranishëm këtu, në Shqipëri dhe jashtë vendi. Përshëndetje dhe urimet më të përzemërta në 35 vjetorin e themelimit të Partisë Demokratike, partisë më të jashtëzakonshme,” tha Berisha.
Ai u ndal në kontributin e themeluesve dhe drejtuesve të shquar të PD-së, duke përmendur emra si Azem Hajdari, Gramoz Pashko, Pjetër Arbnori, Ali Spahia, Bujar Nishani, Sokol Olldashi dhe Genti Bogdani, si dhe dhjetëra drejtues, deputetë dhe qeveritarë që kanë shërbyer në këtë parti ndër vite.
Berisha nënvizoi se “kujtesa, vepra dhe trashëgimia e tyre është dhe do mbetet krenaria e jona dhe e demokratëve në çdo kohë,” duke e lidhur këtë me sfidat e vazhdueshme të PD-së dhe rolin e saj në shoqëri.
Fjala e Berishës theksoi rëndësinë e historisë së PD-së, si dhe detyrën për të ruajtur dhe transmetuar frymën e saj tek brezat e rinj të demokratëve.
