Besimtarët myslimanë në të gjithë vendin po festojnë sot Kurban Bajrami, një nga festat më të rëndësishme të kalendarit islam, e cila simbolizon sakrificën, dashurinë dhe devotshmërinë ndaj Zotit.

Në orët e para të mëngjesit, qindra besimtarë në Durrës iu drejtuan Xhamia e Madhe e Durrësit, ku u fal namazi i Bajramit dhe u përcollën urimet mes besimtarëve.

Gjatë ligjëratës së mbajtur nga imamët, u theksua se mesazhi i Kurban Bajramit shkon përtej dimensionit fetar, duke përfaqësuar një filozofi sakrifice që, sipas tyre, është thelbësore për funksionimin e shoqërisë.

Në predikim u nënvizua se sakrifica individuale në kohë, mund dhe të ardhura është e domosdoshme për përparimin personal dhe kolektiv, ndërsa një rol të ngjashëm duhet ta kenë edhe institucionet në shërbim të qytetarëve.

Sipas ligjëruesve, vetëm përmes përkushtimit dhe përgjegjësisë së përbashkët mund të arrihet një nivel më i lartë ndërgjegjeje dhe harmonie shoqërore.

Pas përfundimit të faljes, besimtarët shkëmbyen urimet e rastit dhe vijuan festimet me familjet e tyre, duke e përcjellë mesazhin e Bajramit në rrethin familjar dhe shoqëror.