Ilir Xhakolli kryebashkiaku i Pogradecit ka reaguar pas lajmeve të publikuara në mediat maqedonase se dhëndri i tij është arrestuar në Ohër pas zbulimit të një fabrike për prodhimin e kanabisit.
Xhakolli ka deklaruar për News 24 se dhëndri i tij nuk ka lidhje me këtë ngjarje se ai ndodhet me pushime aktualisht.
“Nuk e di si kanë dalë këto lajme, emri i dhëndrit nuk është i përfshirë. Ai momentalisht është me pushime në Turqi”, është shprehur Xhakolli.
Gjatë operacionit policia maqedonase ka zbuluar 3000 rrënjë mariuanë, 100 litra vaj kanabisi dhe 600 kg kanabis të tharë.
Fabrika rezulton se ishte regjistruar si filial i kompanisë Greenego 2018 nga fshati Drsllajcë i Strugës, por nuk ka pasur licencë.
