Një 20-vjeçar shqiptar është arrestuar nga autoritetet italiane në qytetin e L’Aquila-s, pasi dyshohet se ka përplasur me automjet një fëmijë 12-vjeçar dhe është larguar nga vendi i ngjarjes pa ofruar ndihmë.

Sipas informacioneve të para, ngjarja ka ndodhur në rrugën Via delle Grazie, pranë Bazilikës së San Bernardino-s, në një zonë ku në atë moment po zhvillohej një koncert dhe kishte prani të madhe qytetarësh.

I mituri është goditur nga automjeti dhe drejtuesi është larguar me shpejtësi, duke vënë në rrezik edhe këmbësorë të tjerë që ndodheshin në zonë. Menjëherë pas aksidentit, në vendngjarje kanë mbërritur shërbimet e emergjencës dhe karabinierët italianë.

Fëmija i plagosur është transportuar në spitalin “San Salvatore”, ku mjekët kanë konstatuar disa fraktura, por pa rrezik për jetën, sipas të dhënave paraprake.

Hetimet janë nisur menjëherë dhe autoritetet kanë arritur të identifikojnë të dyshuarin përmes kamerave të sigurisë dhe verifikimeve në zonë. Sipas hetuesve, i riu dyshohet se ka tentuar të fshehë automjetin në një parking në periferi të qytetit, pas ngjarjes.

Pas ndalimit, ndaj 20-vjeçarit janë ngritur akuza për largim nga vendi i aksidentit, mosdhënie ndihme dhe rezistencë ndaj arrestimit. Autoritetet kanë bërë me dije se testet për alkool dhe substanca të tjera narkotike kanë rezultuar negative.

Hetimet vijojnë për të sqaruar plotësisht dinamikën e ngjarjes dhe përgjegjësitë ligjore të të arrestuarit.