Lista Serbe ka dorëzuar këtë të martë një ankesë në Gjykatën Kushtetuese të Kosovës kundër vendimit të Gjykatës Supreme, e cila konfirmoi rezultatet e zgjedhjeve parlamentare të mbajtura në qershor.

Partia më e madhe e serbëve në Kosovë, e mbështetur nga Beogradi, fitoi nëntë nga dhjetë mandatet e rezervuara për komunitetin serb në Kuvendin e Kosovës. Megjithatë, ajo kundërshton mandatin e deputetit Nenad Rashiq nga Partia për Liri, Drejtësi dhe Mbijetesë.

Sipas Listës Serbe, Rashiq e ka siguruar mandatin falë votave të marra në zona ku, sipas saj, nuk jeton komuniteti serb, çka e bën rezultatin të kontestueshëm.

Ankesa është dorëzuar vetëm një ditë përpara seancës konstituive të legjislaturës së re, e cila është caktuar të mbahet më 6 gusht. Po gjatë kësaj dite pritet edhe takimi mes liderit të Lëvizjes Vetëvendosje, Albin Kurti, dhe kryetarit të Lidhjes Demokratike të Kosovës, Lumir Abdixhiku, për të diskutuar formimin e institucioneve të reja.

Kosova ka zhvilluar tri procese zgjedhore brenda një viti e gjysmë, si pasojë e mungesës së konsensusit mes forcave politike për krijimin e institucioneve të reja dhe zgjedhjen e presidentit të vendit.

Ekspertët e çështjeve juridike vlerësojnë se ankesa e Listës Serbe nuk pritet të pengojë formimin e institucioneve, përveç rastit kur Gjykata Kushtetuese vendos të miratojë një masë të përkohshme.

“Nga pikëpamja politike, ankesa mund të përdoret për ta kontestuar legjitimitetin e Rashiqit. Megjithatë, nga pikëpamja juridike, mandati i tij mbetet i vlefshëm derisa institucioni kompetent ta shfuqizojë ose ta pezullojë atë”, u shpreh Ehat Miftaraj nga Instituti i Kosovës për Drejtësi.