Një nënë dhe vajza e saj 5-vjeçare i shpëtuan mbytjes mbrëmjen e së mërkurës në Francë, pasi automjeti me të cilin udhëtonin humbi kontrollin dhe përfundoi brenda një pishine në një qendër sportive në La Ciotat, pranë Marsejës.

Sipas autoriteteve lokale, drejtuesja 38-vjeçare e mjetit, një Jaguar XF, po manovronte në parkingun e qendrës sportive kur dyshohet se ngatërroi pedalin e frenës me atë të gazit. Makina u përplas fillimisht me fasadën prej xhami të objektit dhe më pas ra në pishinën e brendshme 25 metra të gjatë, ku në atë moment ndodheshin rreth 20 persona.

Nëna dhe fëmija mbetën të bllokuara brenda automjetit që u fundos në ujë, por u shpëtuan falë ndërhyrjes së shpejtë të dy rojeve bregdetare, të ndihmuar edhe nga një qytetar i pranishëm në vendngjarje.

Nga aksidenti, një burrë pësoi lëndime të lehta si pasojë e thyerjes së xhamit, ndërsa nëna dhe vajza u transportuan në spital për kontrolle mjekësore dhe ndodhen në gjendje të mirë shëndetësore. Autoritetet po vijojnë hetimet për rrethanat e plota të ngjarjes.